Neurri berriak aurkeztu dituzte foru euskal Ogasunek, inflazioaren eraginari aurre egiteko

Arabako, Bizkaiko eta Gipuzkoako foru aldundiek neurri sorta berria aurkeztu dute gaur, inflazioari eta egungo egoera ekonomikoaren ondorioei aurre egiteko.

Deflaktazioa

Lehenengo neurriak Pertsona Fisikoen Errentaren gaineko Zergaren (PFEZ) tarte guztiak % 4 deflaktatzea dakar. Horrela, zerga horren ordainketa egungo egoera ekonomikora egokitu nahi da, inflazioaren ondorioz egiten diren soldata igoerek faktura fiskala handitzea eragin ez dezaten. Gogoratu behar da foru ogasunek % 1,5 deflaktatu zutela PFEZa urte hasieran; beraz, deflaktazioaren zifra guztira % 5,5ekoa izango litzateke, azpiko inflazioaren azken adierazle aurreratuarekin bat datorren zenbatekoa.

Neurria irailaren 1ean sartuko da indarrean; beraz, iraila eta urte amaiera bitartean ordaintzen diren soldatetan berehalako eragina izango du. Bestalde, lehenago ordaindutako nominen kasuan, atxikitako gehiegizko zenbatekoak hurrengo Errenta kanpainan doituko dira. Neurriak EAEko errenta-zergadun guztiei egiten die mesede, eta 139,1 milioi euroko eragin bateratua izango du hiru lurraldeetan.

Inflazioaren aurkako kenkaria

Bestalde, foru ogasunek inflazioaren aurkako 200 euroko kenkaria ere onartu dute, 30.000 eurora arteko errenta oinarri orokorra duten zergadunek aplikatu ahal izango dutena. Aldiz, 30.000 euro eta 35.000 euro bitartean, 200 euroko kenkaria pixkanaka murrizten joango da, aitorpenaren oinarria handitu ahala.

Beste neurri batzuk

Gainera, Arabako, Bizkaiko eta Gipuzkoako aldundiek beste neurri finantzario batzuk ere hartu dituzte, pertsona autonomoen eta enpresen egoera arintzeko eta hauei likidezia gehiago emateko. Autonomoen kasuan, ekitaldi honetako hirugarren eta laugarren hiruhilekoetako ordainketa zatikatuak egiteko betebeharretik salbuetsita geratzen dira.

Bestalde, 50 milioi eurotik beherako eragiketa bolumena duten eta enpresa-taldeetan sartuta ez dauden enpresek ere ez dute Sozietateen gaineko Zergaren ordainketa aurreraturik egin beharko.

Azkenik, 11/2022 Errege Dekretu Legea dela eta jasotzen diren 200 euroko dirulaguntza publikoak salbuetsita geratzea erabaki dute foru Ogasunek.

Informazio gehiago

 

Azken berriak