Ostalaritzarako Covid19 laguntza berriek 30 milioi euroko zuzkidura dute, autonomoei, mikroenpresei eta enpresa txikiei zuzenduta daude, eta jarduerari eusten, galera ekonomikoak arintzen eta, era horretan, enpleguari eusten laguntzea dute helburu nagusi. Hori dela eta, enplegu hori bermatu ahal izan dadin, irekitzeko murrizketak kendu eta jarduerari berriz ekiten hasi ondoren jarduera horri gutxienez 4 hilabetean eusteko eskatuko zaie laguntzak jasotzen dituzten establezimenduei.
Zehazki, 3 langile baino gutxiago dituzten establezimenduek 3.000 euroko laguntza jasoko dute, 4-10 langileko plantilla dutenek 3.500 euro, eta 10 langile baino gehiago dituzten establezimenduek, berriz, 4.000 euro.
Euskadin, ostalaritzaren sektorearen % 99 baino gehiago mikroenpresek eta enpresa txikiek osatzen dute. Guztira, 12.219 establezimendu dira, eta, haietatik, erdiak baino gehiago langile 1ekoak edo 2koak dira. Zehazkiago, 8.297 establezimenduk 3 langile baino gutxiago dituzte, 3.224k 4-10 langile, eta 698k 10 langile baino gehiago.
