Influencerren marketina tokiko negozioetarako

Lehen, influencerrak marka-preskriptore hutsak ziren, ekitaldietan boloak, kale erdian selfieak eta unboxing-kanpainak egiten zituztenak. Baina aspaldi utzi zioten horri.

Egun, marketin-tresna eraginkorrak dira, eta tokiko merkaturik espezifikoenean zein nazioartean jardun dezakete.

Sare sozialei esker, influencerrak gai dira euren jarraitzaileen artean inpaktu handia lortzeko, telebistako publizitate-kanpaina batek baino inpaktu handiagoa, batik bat, publiko gaztearen artean. Eta erakarpen- eta pertsuasio-ahalmen hori dela eta, ezinbesteko tresna da edozein marketin-estrategiatan.

Marka handi askok euren marka-irudi bihurtzen dituzte influencerrak: kafe-marka bat kontsumitzen duen aktore bat; marka jakin bateko bitxiak janzten dituen aktorea; kosmetika-linea bat erabiltzen duten modeloak…

  • Baina marketin-mota hori ez da multinazional handientzat soilik. Ezta gutxiagorik ere. Gaur egun, gure inguruko tokiko-saltoki gehienek eraginkortasunez eta arrazoizko prezioan jo dezakete influencerren marketinera.

Influencerrek laguntza handia eman dezakete egoera askotan:

Negozio edo marka berri bat ezagutarazteko.

Negozio bat merkatuan sartzeko prest dagoenean, oraindik ezagutzen ez duten kontsumitzaileen konfiantza lortu nahi du. Tokiko influencerren estrategia bat ondo diseinatuz gero, asko lor dezakegu:

  • Influencerrek marka bat gomendatzen dute, eta haren babesle bihurtzen dira.
  • Influencerren jarraitzaileek, haiengan uste osoa dutenek eta haien eguneroko argitalpenei jarraitzen dietenek, gomendatutako produktu edo zerbitzu berri horren aldeko jarrera izango dute.

Eta, horregatik, ondo aukeratu behar duzu irudikatuko zaituen pertsona, zure markaren jaiotza haren irudiarekin lotuta egongo baita. Adibide gisa, har dezagun jatetxe berri baten irekiera:

  • Zenbait foodie kontrata ditzakegu, lokala ireki aurretik hari buruzko itxaropena sor dezaten euren blogetan eta sare sozialetan. Ondoren, jatetxea irekita dagoenean, handik pasa daitezke, jarraitzaileen aurrean jatetxe hori itzela dela egiaztatzeko.

Produktu berri bat aurkezteko.

Merkataritza-marka batek produktu berri bat merkaturatzen duenean, aukera du bere publiko potentzialaren artean sustapen-kanpaina segmentatua abiatzeko. Nola? Gure produktu berriarekiko profil egokia duten jarraitzaileak dituen influencer baten bidez.

  • Lentzeria-denda bat badugu eta Bizkaiko eremu geografikoan neurri handiko linea bat sustatu nahi badugu, egokiena izango da sektore horretan espezializatuta dagoen influencer bat bilatzea, edo gehiago, linea horri buruz hitz egin dezaten euren blogetan eta sare sozialetan. Izan ere, haien jarraitzaile gehienek profil hori izango dute, seguru asko.

Branding-ekintzak egiteko.

Influencerrek tokiko merkatuan egin dezaketen beste jarduera bat branding-ekintzak dira. Tokiko enpresek pertsona ezagunengana jotzen dute, euren markari bultzada bat emateko. Esaterako, albistegietako aurkezle batek profil ezin hobea izan dezake enpresa txiki baten emaitza ekonomikoen edo hedapen-planaren berri emateko, sinesgarritasun-plus bat baitu biztanle gehienen aurrean.

Ekitaldi baten irismena indartzeko.

Saltoki eta enpresa askok sari-banaketak, urteurren-jaiak eta antzeko ekitaldi sozialak antolatzen dituzte, euren jarduera-maila txikia denean ospe-bultzada bat lortzeko, esate baterako, Gabonetako kanpaina edo beheraldiak hasi aurretik. Eta horrelako ekitaldiak ezin hobeak dira, influencer batek edo gehiagok sare sozialetan gure negozioaren irudirik onena erakusteko. Urteurren-jaia ospatzen duen bitxi-denda batek modako edo zinemako tokiko pertsona ospetsuengana jo dezake, bere sortze-lanei xarma emateko.

 

Baina, noizean behingo egoera horiez gain, influencerrek beste modu bat dute marka-preskriptoreak izateko: negozio bateko edo gehiagotako irudi bihurtzea. Horixe da, hain zuzen, bere bezero potentzialen aurrean duten birtualtasun handia: euren argitalpenetan marka edo denda jakin bateko arropak, kosmetika edo osagarriak erabiltzen badituzte ere, oso modu sotilean egiten dute haien publizitatea, eta argitalpenek ez dute publizitate-helbururik, itxuraz.

Baina tresna horrek alde txarrak ere baditu: fenomenoak hainbesteko garrantzia hartu du, non jende askok jarraitzaileak erosten baititu Interneten, benetan ez duen ospe-irudia lortzeko. Apur bat nabigatzea nahikoa da, edozein sare sozialetarako jarraitzaileak saltzen dituzten web-orriak aurkitzeko. Tarifak merke samarrak dira:

  • 10 euroan baino gutxiagoan, 10.000 jarraitzaile.
  • 75 euroan, 100.000 jarraitzaile.
  • 18 euroan, 10.000 like.
  • Eta 500 iruzkin zoragarri lor daitezke 50 euro baino gutxiago ordainduta.

Egia esan, influencerren marketinaren inguruko datuak ikusita, ez da arraroa merkatu faltsu hori areagotu izana. 2018an, markek 35 milioi euroko inbertsioa egin zuten gure inguruan, preskriptore horiekin kanpainak egiteko; H2H agentziaren datuen arabera, aurreko urtean baino % 400 gehiago. Eta, hala ere, uste da inbertsio horren erdiak ez zuela itzulkinik izan.

  • Duela gutxiko kasurik barregarrienetako batean, Arianna Renee, arii, izeneko balizko influencer batek pentsatu zuen 2,6 milioi jarraitzailerekin Kim Kardashian berria izan zitekeela, eta bere moda-linea merkaturatzea erabaki zuen. Emaitza: ez zuen lortu ezta 36 kamiseta saltzea ere. Gainera, bere frustrazioa azaldu zuen post batean, baina berehala ezabatu zuen, barregarri geratzen ari zela ohartu zenean.

Horrelako egoerak ikusita, Unilever enpresak, elikadurako, zaintza pertsonaleko eta etxeko produktuak saltzen dituen multinazional handi batek, eta beste batzuek jarraitzaileak erosten dituzten influencerrekin lanik ez egiteko erabakia hartu dute, marketin-mota horretan dagoen iruzurra agerian uzte aldera.

Hori dela eta, influencer bat marketin-ekintza baterako kontratatu aurretik, komeni da agentzia espezializatuen aholkuak bilatzea.

Azken berriak

Soldata erregistratzeko betekizun berria

Langilerik baduzu kontratupean, soldata-erregistro bat ere bete beharko duzu Azken hilabeteotan asko hitz egin da lanaldiaren erregistroa osatzeko betebeharrari buruz,...